СИНДИКАТОТ ЗА ОДБРАНА НОВ КОНСТИТУТИВЕН ЧЛЕН НА ССМ
Синдикатот за одбрана и безбедност (СОБ) е нов конститутивен член на Сојузот на синдикатите на Македонија, одлучи денес Советот на ССМ, усвојувајќи ја претходно усвоената Предлог – одлука на Претседателството.
Синдикатот за одбрана и безбедност направи смел чекор и ние им честитаме на храброста. Приемот е во потполна согласност со сите постојни акти на ССМ и на СОБ. Влегувањето на СОБ во ССМ се влопува во нашата стратегија за зголемување на членството и за окрупнување на Синдикатот, изјави по тој повод претседателот на ССМ Живко Митревски.
Успеавме да го надминеме индивидуалниот пристап на синдикалните интереси. Се тргна настрана човечкиот фактор и мислам дека е време во Република Македонија да се пристапи кон окрупнување на синдикалното движење, рече претседателот на СОБ Ристо Ајтов.
На денешната седница на Советот е прифатена измена на Статутот на ССМ за влегување на новиот член СОБ.
При промоцијата на прирачникот “Права од работен однос на жените и младите во Република Македонија“, што ја издадоа ССМ и Фондацијата “Фридрих Еберт“, се разгледуваше сработеното на двете секции, Секцијата за жени и Секцијата на млади. Претседателот на Секцијата на жени Елизабета Гелевска и претседателот на Секцијата на млади Ирена Смиљановска зборуваа за активностите во изминатиот период и ги најавија проектите за следната година.
Претседателот Митревски посебно му се заблагодари на амбасадорот на Словачка Роберт Кирна за ангажманот и поддршката на Република Словачка во синдикалното движење во Македонија.
