ССМ, КСС И ФЕС ЗА 2012 ГОДИНА ОРГАНИЗИРААТ ШКОЛА ЗА МЛАДИ СИНДИКАЛНИ ЛИДЕРИ
ОГЛАССојузот на синдикатите на Македонија, Конфедерацијата на слободни синдикати и Фондацијата “Фридрих Еберт“ за 2012 година организираат “Школа за млади синдикални кадри“. Целта на школата е едукација и градење синдикални кадри, кои понатаму ќе можат да спроведуваат синдикално образование, да водат синдикална политика во нивните работни средини или да станат синдикални лидери.
Школата е замислена како серија од шест дводневни семинари си различни теми. Секоја од темите ќе биде презентирана од заеднички избрани експерти и предавачи, низ модерно осмислени модули со употреба на интерактивни техники , вклучувајќи и индивидуални или тимски семинарски задачи и презентации, кои се задолжителен дел за сите избрани учесници.
|
Предвидени теми за семинарите се: |
Период на реализација: |
| Суштина и значење на синдикалното организирање, права од работен однос, колективни договори | средина на февруари |
| Тимска работа | март |
| Синдикално лидерство | април |
| Комуникација - разбирање на луѓето и нивната природа | мај/јуни |
| Организирање и водење состаноци | август/септември |
| Преговарање | октомври |
Развојот на современото синдикално организирање не може да се постигне без промена на свеста, односно начинот на размислување на вработените. Во тој контекст е клучна улогата на младите и на нивното лидерство.
Во светот, посебно во земјите со долга традиција на синдикално дејствување, едукацијата на младите синдикалци е вообичаена пракса, која се изведува организирано и систематизирано. Бидејќи во Република Македонија досега не се посветува доволно внимание на овој план, неопходно е едуцирање на младите синдикалци и поттикнување на нивното лидерство во синдикатите на сите нивоа. Ова прашање е посебно значајно со оглед на постоењето на синдикалниот плурализам во Република Македонија.
