ПРОМОВИРАНА КНИГАТА “НАШИ ПЕНЗИОНЕРСКИ ВРЕМИЊА“
6.11.2012
Денес во Сојузот на синдикатите на Македонија се одржа свечен собир, чиј повод беше промоција на книгата на претседателот на Сојузот на здруженијата на пензионери на Македонија Драги Аргировски “Наши пензионерски времиња“.
На свечаноста присуствуваа претседателот на ССМ Живко Митревски, министерот за труд и социјална политика Спиро Ристовски, градоначалникот на општина “Ѓорче Петров“ Сокол Митревски, потоа претставници на здруженијата на пензионери од земјата и голем број други гости.
По повод промоцијата Живко Митревски од името на ССМ на авторот Аргировски му предаде благодарница, при што истакна дека ова е повод, покрај потпишаниот Меморандум за соработка меѓу двете организации (на 8 октомври 2012 година), за продлабочување на соработката на двете организации. Двете организации имаат остварување заеднички стратешки цели, како што е нов и стабилен пензиски систем и остварување благосостојба на сите граѓани.
Книгата е еден вид трактат на третото доба, со збирка на многу записи и белешки за пензионерите. Таа е белег на едно време и за едни години, за едно постоење на популацијата која поседува голем потенцијал создаван и собиран низ годините, изјави авторот Аргировски.
