СЕДМИ СПОРТСКИ ИГРИ НА СГИП
11.06.2009
Од 11 до 14 јуни во Струга ќе се одржат Седмите спортски игри на Синдикатот за градежништво, индустрија и проектирање. Учествуваат околу 200 натпреварувачи од осум градежни компании...
Денес почнуваат Седмите спортски игри на Синдикатот за градежништво, индустрија и проектирање. Во хотелот “Еуротел“ кај Струга од 11 до 14 јуни ќе се натпреваруваат околу 200 учесници од осум претпријатија: “ДГ Бетон – АД Скопје“, “ГД Гранит АД“ – Скопје, “ДОО Мавровоинженеринг“ – Скопје, “АД ГИМ“ – Скопје, “АД Киро Ќучук“ – Велес, “АД Тондах“ – Виница, “ФХЛ Мермерен комбинат“ – Прилеп, “АСД КИК“ – Куманово и “ДН Вардар АДГ Пелагонија“.
Учесниците во машка конкуренција ќе се натпреваруваат во мал фудбал, кошарка, пинг понг, шах, риболов, крос, пикадо, скок во далечина и влечење јаже. Жените ќе се натпреваруваат во кошарка, пинг понг, шах, крос, пикадо, скок во далечина и влечење јаже.
Овие средби не се ограничени само на спортувањето, туку се одлична можност за меѓусебно дружење и запознавање. Се разговара за состојбите во градежништвото, за заедничките проблеми и улогата на синдикатот, информира Павел Трендафилов, претседател на СГИП.
За жал, светската финансиска криза многу се одрази врз градежништвото. Поради финансиски проблеми на игрите годинава, и покрај досегашното редовно присуство на игрите, нема да учествуваат вработените од четири претпријатија – “Градежниот институт Македонија“, фабриката “Карпош“, “Џумајлија“, “Цементарница Усје“ и “Кнауф Радика“, рече Трендафилов.